「這些機會不屬於我們的。」朋友酸溜溜的表示，知道身邊有人炒三四線股贏到開巷。如果是一年前，自己會對故事真實性存疑，今時今日則信到十足。因為滬港通之後，三四線股連環出現大製作，市值大成交旺，買得中斬斷窮根真的一點不出奇。

炒三四線嘥時間

人家炒三四線，我哋又炒三四線，卻嫌三嫌四，市值大嫌泡沫大，成交大又嫌假。自命清高走去炒幾億市值，成交奀過鬼，以為有數得計的細價股，無發達點可以怨得人？

其實那些不外乎是香港人塘水滾塘魚、玩了十幾二十年循環不息的遊戲而已，但現在是內地文化入侵，食大茶飯的世界，人家及時與時並進，攞條命博，買得大贏得大，實在無得恨咁多。

話雖如此，自己對香港三四線也提不起興趣，就算深港通情況可能變本加厲也如是說。因為橫豎都係，直情應該北上炒A股鬥癲。香港無數計的大型三四線，成交加埋不外乎十幾二十億，要炒概念炒動力，基本上整個A股市場任君選擇，成交過萬億，市值四十萬億以上，是大撼大的天堂，何必浪費時間心力在香港僅有的幾個選擇？

所以香港整個市場已經唔湯唔水，正路股炒唔起，妖股又被內地人一步到位炒到過晒火位，完全無處入手。近期接近季結，炒不加息氣氛好轉，正正是把握機會撤退的時候，他日北上又好，遠走日本歐洲都好，相信更加有前途。