樓價高企,不少人都大呻買樓艱難,而「上車須父幹」更是年輕人成功上車的標籤。本報昨日直擊八十後準夫婦睇樓過程,他們聲言拒絕家人幫手,要做踏實的上車客。

八十後準夫婦靠自己儲錢上車,昨日更於屯門四出睇樓。

預3球半 月儲兩萬

已經畢業八年的Linda,現職測量師,與男友都有穩定工作,並準備兩年內拉埋天窗,近一個月四出睇樓,為將來的愛巢做定功課。Linda與男朋友的上車路線相當清晰,為了將貨就價,他們一開始就有共識要搵屯門樓,Budget亦定於350萬元的兩房戶。

為了達到至少一成的首期目標,兩口子於三年前開始儲錢。Linda笑言自己同男朋友儲錢方法,亦與本報的八十後夫婦上車血淚史相近,但拍拖活動並非流連公園,而是行山做運動,減少出街睇戲次數,「去旅行都是去短Trip」,儲蓄之道在於「慳」,現時二人每月儲逾兩萬元。

他們昨連睇十多個單位,由市中心至區內二線屋苑都有,而Linda全程做足筆記,無論面積、間隔、坐向,以至內籠都記錄在案,惟最後未有入市,「雖然好多單位都Out budget,但自己會留意市道,如果叫價跌番就會考慮」。

祥益黃振文稱,雖然政府早前加辣,但由於屯門區仍然不乏樓價400萬元以下的盤源,未見上車客比例減少。但不少換樓及投資客態度轉趨觀望,令本月區內二手交投按月減少三成。