近幾日美股梅花間竹，日升日跌，可見華爾街雖然睇死耶倫會刪除「耐心等待」字眼，但對股市如何解讀，都仲未有一致的睇法。事實雖然美國經濟表面睇落係唔錯，但唔少人都已經提出質疑，指在失業率持續改善下，人均收入及時薪增長卻仍是似有還無，就業市場的改善仲係停留喺重量唔重質的階段。

中電信管理層對4G上客數字的樂觀預測，刺激股價做好。（資料圖片）

太陽日誌

除此之外，聯儲局退市及加息的預期，經已令美國樓市近一年升勢大幅減慢，早幾日睇到篇報道話，今日美國約有5,000萬間房屋仍未還清按揭，當中有一成仲係處於負資產，而唔少物業亦都只係啱啱上番水面，大約兩成物業出售後，業主還完畀銀行套現僅得樓價兩成，大約3%於賣樓後更只攞得番5%。

負資產當然唔使諗換樓，在樓市交易成本高昂的美國，後面果兩類業主要上屋搬下屋，都畀唔到新屋首期，事關金融海嘯後，兩房收緊對按揭審批，政府也提高銀行資本充足要求，佢地想重新借到按揭唔容易，樓市淡風，從收緊超過一年的動工數據，已經可以睇到一二。

加息進程料緩慢

尋晚聯儲局點去處理新一步退市行動，文章曝光時，相信看官都已經知道答案，睇近期十年債息由2.26厘，級級落去返2厘左右，債商都係預期加息難免，但幅度相當有限。

炒兩會之後有穩經濟政策出台，A股升到癲，滬綜指尋日又升74點，收3,577點，改寫七年高位。恒指都有218點進帳，收24,120點，成交962億元。世紀合併後首日掛牌的長和（00001）升0.9%，收151.5元，套戥帶動和黃（00013）升0.5%，收103.9元。周初隊到兩年多新低64.35元的滙控（00005），連續兩日死貓彈，收65.9元，升1.3%。

吉汽業績遜預期

近幾個月內地經濟數據差過鬼，中資公司業績亦都無乜特別標青，吉利汽車（00175）全年賺14.31億元（人民幣．下同），按年跌46%，中期業績已見重塑自主品牌以及俄羅斯盧布貶值的影響，預咗倒退，不過最終數字仲係稍差過預期，內銷及出口分別倒退16.8%及49.8%。

不過，下半年EC7轎車的銷售唔錯，佔全年汽車銷量近三成九，展望今年有新款GC9轎車，及兩款帝豪及遠景系列的SUV推出，加上盧布貶值的匯兌損失屬一次過，今年業績回到25至28億元左右應該無乜難度，市盈率9.1至10.2倍，與歷史平均值接近，是昨日股價唔多肯跌的主因。睇番股價由去年底盈警後低位2.4港元至今累積反彈唔少，可以等等，鍾意turn around故事的，可以諗吓隻長汽（02333）。

中電信（00728）去年成績同樣無乜驚喜，賺176.8億元，微升0.7%。集團預告一五年資本開支會比舊年大增四成，至1,078億元，近六成是應付移動業務，主要是建設32萬個4G基站所需。

此一時彼一時，早前聯通（00762）派成績表預告資本開支大增，股價見光死，反而尋日中電信業績麻麻，但老總話豪言今年計劃賣1億部4G終端機，估計當中6,000萬會用中電信服務，股價抽1.6%收4.84元，似乎攞4G牌趁消息出貨已經告一段落，未來幾個月有鐵塔公司消息及由零開始的4G上客數字支持，斷估今次應該係時候開車喇。