隔晚美股早段已見抽升，夜期高收，最後華爾街三大指數維持高位收市。不過，期待港股突破的好友，昨可能會相當失望。期指以23,982點開出，現貨開市後隨即見全日高位24,045點，之後回到24,000點樓下運行。

恒指期貨走勢

午後淡友藉A股升幅收窄，施加壓力，把期指由23,900點樓上推到23,749點，之後A股戲劇性拗腰重上3,500點樓上收市，期指稍為收復失地，日市收23,868點，低水33點，恒指收23,901點跌48點。

近日港股跟唔足A股升浪，但即市卻相當受A股波動表現影響，確實愈來愈有A股味道。基於昨日期指回吐未觸及周一早市支持23,664點，短期反彈勢頭未至於被破壞。

客觀睇，近日強美元形勢，的確使到港股有拉牛上樹之感，唔單止未能受惠於A股破頂，連美股強勁反彈，也要背馳收市，即使昨日國指保住24點升幅收市，即市高位11,892點，破一破20日及50日線，卻未能守住收市，令人有點失望。

今個星期焦點是聯儲局的議息會後聲明，以及怎樣修飾前瞻性字眼，開大開細好快揭盅。手上好倉，短期會繼續以24,400點附近為首個目標，以確認跌穿23,650點作止蝕。