上周六人行減息都谷唔到港股返到二月初降準後高位25,048點，大市氣氛欠佳，昨日所見，好友早市仲想守住24,750點關口，上午見過24,753點，午市一失守，市況立即走晒樣。期指連破24,700點及24,600點兩個關口，低位見過24,547點，期指日市收24,589點，低水114點，成交4.99萬張。

恒指期貨走勢

恒指昨收24,702點，跌184點，國指更跌268點，收11,945點，大市主板成交增至798億元，人行減息的舉動，為春節前後趁成交淡靜，逐少推高大市的大戶，狠狠地趁好消息出貨提供誘因。

昨指數跌穿10日線24,802點，險守20日線24,682點樓上，中線大市由22,529點起步，到一月初突破20日線後，未試過多於兩日收低於20日線樓下，昨恒指即市見24,663點，穿一穿20日線再拗腰收復，暫時未能判斷已脫離危險期，亦要小心指數一旦確認失守，較深度的短期調整可能會出現，回試24,200點附近水平。

周一偷雞在24,930點AO沽期指，帳面暫時有300多點利潤，先以24,750點作止賺，睇吓可唔可以趁正月發個新年財，初訂期指目標24,320至24,380點之間。