畀小弟批死，昨日成個市擺出一副好消息出貨格，三月期指開唔到兩萬五，比估計更弱，24,930點開出，隨即見一見24,987點全日高位，淡友很快出手施加壓制，期指短短六分鐘內由24,834點直插至24,587點。

恒指期貨走勢

在連鎖反應下，惹來唔少好倉客冚倉，結果十點未夠，全日期指高低位已出現，之後期指曾經反彈見24,906點，但經過V形先急跌後急抽下，好淡雙方都步步為營，最後日市期指收24,803點。

昨動用三分一注碼，按預定計劃開市AO價沽，可惜當見24,600點失守，筆者仲八緊有乜突發事，轉個頭經已彈返上24,900點邊，真係有胡唔食罪大惡極。

過去幾次人行放水，其實已經反高潮多過升到尾，好似上次降準，恒指亦高開低走，之後恒指由高位25,048點回到24,226點先止跌，合共回調822點，假如歷史重演，以昨日早市恒指24,997點高位，博今浪見頂回返600至800點其實唔係奢望。

事實上，今次減息連二月初降準所出現的高位都去唔到，好友失望是理所當然，昨日本來一心短跑，最後都改變主意，實行以期指升穿25,000點止蝕，淡倉睇多幾日至算。