阿莊喺度先同大家拜個年，祝大家羊年股運亨通。馬年最後一個交易日，恒指再升47點，不經不覺恒指已連升五個交易日，累積升幅超過500點。上個禮拜五晚，道指升154點，重上18,000點關，睇嚟喺美股帶挈之下，羊年首個交易日恒指好大機會紅盤高開並突破25,000點關。

隨着內地玻璃市場供求情況改善，信玻盈利能力有望回升。(資料圖片)

上個禮拜三市場焦點當然落喺「三桶油」身上，有消息指中央希望趁油價低迷時，提升國企營運效率，經濟顧問現正就超級合併進行可行性研究，受消息刺激，中石油（00857）、中海油（00883）及中石化（00386）股價做好，分別升3.09%、2.7%及4.65%。不過，重組家陣十劃都未有一撇，加上喺油價持續低迷之下，三桶油升勢都好難持續，現階段都係審慎為上。

做定功課迎業績期

踏入三月，將會有更多公司公布業績，投資者不妨做定功課，睇下有咩業績股可以吼吓，至於阿莊就睇中隻信義玻璃（00868）。

信玻去年底已發咗盈警，料截至十二月底止年度純利將較一三年度的22.06億元減少三至五成，主要因為完成分拆信義光能（00968）上市後令來自後者的溢利貢獻減少，以及因內地玻璃製造業產能過剩，導致浮法玻璃平均售價持續大幅下跌，但公司就確認去年首十一個月期間的銷售及銷量較一三年同期均有所增加。

事實上，信玻股價去年二月由7.19元高位反覆回落，一度跌穿4元，相信已反映盈利倒退因素，隨着個別廠房因環保要求未達標準而被淘汰，估計今年行業新增產能減少，而且在農曆新年過後，工廠關閉的情況將較明顯，相信有助浮法玻璃售價回升。

此外，內地最近的新屋開工數據及玻璃庫存均顯示，玻璃市場今年可望復甦，即使集團去年盈利出現倒退，但憧憬最壞情況已過下，估計會對信玻股價有支持。早前公司主要股東不時在市場增持股份，證明對前景抱一定信心。

信玻將於三月一日公布業績，近日股價走勢向好，並重返100日線水平之上，估計業績公布後隨時會有突破，阿莊計劃吼佢回落至100線水平約4.3元水平買入五萬股，上望目標4.95元，止蝕4元。