大埔白石角科進路與博研路交界住宅地將喺今個禮拜五截標，係新春假期後首幅截標地皮。雖則呢幅並唔係臨海地皮，兼且靠近公路。但劉Sir有測量師老友覺得近排地價回升，所以呢幅白石角地皮每方呎樓面地價，都仲可以同舊年批出嘅同區臨海地「睇齊」，估計呎價最多達約3,600元，估值約莫32.42億元，係市場預期上限價。

大埔白石角科進路與博研路交界住宅地佔地超過25萬方呎，估值最高約34.42億元。（資料圖片）

高緯環球張翹楚指，地皮雖然並非臨海，但仍睇好做價。

白石角住宅地基本資料

今次截標嘅白石角科進路與博研路交界大型住宅地，佔地超過25萬方呎，總樓面更超過90萬方呎。

劉Sir知道，地皮嘅位置比較輸蝕，靠近吐露港公路方向，但係業界對地皮嘅做價都幾有信心。

地價續升 無懼位置差

老友高緯環球張翹楚話，呢幅地皮雖然並非臨海，不過最近幾個月地價都慢慢升緊，所以呎價未必會差過同區批出嘅臨海地，有機會做出「海景價」，佢估計每方呎樓面地價約莫3,500至3,600元左右。計返估值最多大約32.42億元，係市場估值上限。

不過都有部分測量師則對地皮做價有保留，好似美聯就睇得淡少少，該行估計地皮每方呎樓面地價約莫3,000元，即係估值大概27.02億元，係市場最低估值。

劉Sir話畀大家知，舊年政府批咗兩幅白石角臨海地，以科進路住宅地嘅每方呎樓面地價比較高，地皮雖然喺舊年三月出現過一次流標紀錄，但係政府其後為免流失供應，調低底價後「翻叮」成功，喺舊年十一月由億京發展以每方呎樓面地價約3,552元投得，成交價超過25.4億元。

至於另一幅批出嘅同區臨海地係科研路住宅地，舊年五月每方呎成交樓面地價大約3,300元，地價逾24億元。

同區三地新財年出擊

其實，白石角嚟緊都唔憂無新供應，該區仲有三幅大型地皮會留喺新財政年度推出，分別係科進路、科研路、及創新路共三幅住宅用地。

劉Sir知道，呢幾幅地喺舊年同埋上述科進路與博研路交界地皮，一併獲得城規會通過改劃做住宅用途，撇除今個禮拜五截標嘅科進路與博研路交界地皮，淨返下年度推出嘅三幅地皮，預計可提供超過2,500個單位。