樓市續闖高峰，繼天水圍嘉湖山莊追回九七樓花價後，喺九七年賣樓嘅荃灣愉景新城，一個連天台單位啱啱賣咗790萬元，比九七年嗰陣嘅高位再高逾10萬元，料創歷來新高。另青衣盈翠半島高層戶，成交實用呎價逾1.47萬元，料創標準戶歷史新高。

本港樓價續升，新高個案不斷，當中愉景新城有單位售價破九七年高位。（資料圖片）

近日二手樓高價成交

新財政預算案會喺農曆新年後公布，劉Sir收到風，有買家驚政府再出招，即刻加快入市，用咗約790萬元，購入愉景新城9座連天台單位，用實用面積650方呎計，呎價要成12,154元，成交價同呎價都創屋苑新高，單位三年內升值逾46%。

代理話九七賣樓嘅愉景新城，當時有個12座連天台單位，同樣係賣776.9萬元，已經係全屋苑保持咗十八年嘅紀錄，依家啱啱被打破。

同區幾個大屋苑都有成交，代理話，同區綠楊新邨S座高層單位賣咗530萬元，實用呎價大約1.12萬元；區內萬景峯2座中層A室，成交價更去到成1,780萬元，實用呎價逾1.38萬元。

星河相連戶1360萬沽

其實中大價樓樓價近排都升得幾勁，市場有消息透露，盈翠半島1座高層D室，實用面積784方呎，近期以約1,153萬元賣出，實用呎價去到約14,707元，個呎價相信係屋苑標準單位新高。富誠地產鄧宇謙話，鑽石山星河明居C座高層相連戶，成交價達約1,360萬元，估計都係屋苑新高。

細價樓方面，中原陳永強話，粉嶺碧湖花園6座中層G室兩房單位，上車客見個價係咁升，怕過咗年個價仲高，就用375萬元入市，實用呎價9,375元。祥益古文彬話，屯門海翠花園連天台特色單位，賣565萬元，實用呎價9,278元，創屋苑新高。

黃埔實呎過萬五新高

藍籌屋苑亦有癲價，美聯吳肇基話，鰂魚涌太古城衛星閣中層H室，連租約都賣1,148萬元，係同類新高，實用呎價約16,377元。

市場消息又話，紅磡黃埔花園2期15座中層D室，實用面積389方呎嘅兩房單位，賣成599萬元，實用呎價成1.54萬元創同類新高。香港置業歐淼林亦都話，同屋苑同期數11座低層E室賣658萬元，實用呎價約1.41萬元，創同類新高。