馬年進入倒數階段，炒家都提早收爐，昨港股在5字頭的低成交額下悶局收場，恒指收市升43點，報24,726點。

恒指期貨走勢

至於即月期指日市收24,754點，高水27點，成交2.38萬張，乃踏入一五年以來最低紀錄，買賣兩閒下，多少影響技術走勢測市的準確度。

唔少人認為只要維持10日線樓上埋年，春節假期後開紅的機會將提高，筆者就未敢樂觀，尤其國指自一月開始，浪頂一個低過一個的趨勢未改，分別為12,400、12,337、12,281及12,090點，阻力一直下移，至少要大成交突破12,090點，後市再上說法才更具可信性。

昨日提過，馬年恒指大部分時間處上落市悶局，可是資金在藍籌不同板塊間轉移，走勢頗為兩極化，中資銀行、保險股在人行放水下大幅跑贏指數，國壽（02628）累升逾五成稱王。相反，反貪腐及限制官員訪澳，兩隻濠賭股跌幅驚人。

假如炒股唔炒市情況今年持續，在馬年大落後的股份中，在下暫時睇好今年兩隻跑輸指數一截的食品股康師傅（00322）及旺旺（00151），兩者均可受惠內地低通脹及中央好可能需要刺激內需支持經濟。