千呼萬喚，人行出到降準的最後絕招，個市都依然唔多領情，A股開高走低，港股好些少，恒指升85點，收24,765點，但對睇實隔晚降準消息一出，夜期挾到25,072點，比日市狂升416點的期指客而言，昨日的反高潮，難免令人失望。

恒指期貨走勢

二月期指，昨開得唔算高，以24,984點開出，不及夜期收市，好友隨即發力，在現貨開市前，推升至25,174點，不過，美好時光也隨即告終，第一個小時交易，趁好消息做淡的大戶相當落力，期指每百點插落去，落到24,700點先初步企定，但24,827點及24,847點，反撲無以為繼，期指在A股收市一刻，曾落到24,623點，日市收24,770點，成交6萬張。

恒指升見25,048點高位後陰燭倒跌收場，可見大市仲未想脫離上落市格局。形勢上，距離春節兩星期，人行再減息、降準機會已大減，在好消息出盡之下，似乎指數有機會先試24,300至25,000點上落區的較低端。

筆者惟一感到較可惜的是，基於傾向等回吐開好倉，昨日錯過早市短持淡倉的機會。恒指短期雙頂已成，只有維持原訂計劃，等指數測試24,300點附近搵到支持再算。