人行失驚無神降存款準備金率0.5個百分點，港股都預咗高開，恒指開市升368點，報25,048點，亦見了全日高位，之後輾轉回落，仲一度倒跌，最後雖然力保不失，但全日只升得85點，以24,765點收市，國企指數亦只升21點，收報11,789點，全日主板成交金額1,001億元。至於內地股市同樣開得高，收DAY LOW ，滬綜指全日波幅近4%，最後以3,136點收市，跌37點。

主營針織服裝OEM業務的申洲，業績值得憧憬。（資料圖片）

事實上，好多大行一早都預咗人行會降存準率，尋日趁好消息出貨亦屬正常，但係阿莊就無預個市差成咁，以尋日走勢睇，臨近年尾好多投資者都提早收爐，農曆新年前港股都唔會有運行。上次人行減息，令A股開始進入瘋牛狀態，今次效力大不如前，相信同A股累升已多同埋有關部門打壓兩融有一定關係，所以都唔好旨意A股可以帶挈港股。

電力股咪心急撈底

尋日大市雖然升，但係全日主板下跌股票有794隻，升的只有491隻。電力股在上網電價再度下調下傷亡慘重，華能（00902）及華電（01071）均跌逾一成，大唐發電（00991）亦跌9.7%，事實上，電力股強勢已有一段時間，尋日大成交下跌，睇嚟跌勢未止，投資者千祈唔好心急撈底。

除咗電力股無運行之外，近排好多一向表現硬淨的基金愛股，都失驚無神跌咗落嚟，好似北控水務（00371），明明有「水十條」國策支持，但已連續出現六支陰燭，最近兩個交易日，更因為入股金彩（01250）不獲市場接受，令股價大成交下跌。

至於油田服務股，由於油價再次掉頭向下，所以亦都終止咗近日反彈勢頭，安東油服（03337）回吐4.3%，華油能源（01251）亦跌6.75%。

將於下月二十五日公布業績的申洲（02313），近日股價反覆走高，昨日升1.89%，以29.5元收市，跟一年高位29.8元相距不遠。集團主要為大型品牌提供針織服裝OEM業務，受惠於內地棉花價格下降至國際水平，加上人民幣貶值，均有助提升公司毛利率。

另外，集團擴充產能進度理想，位於越南的第一期布料生產設施料三月啟用，屆時可提高柬埔寨廠房的使用率，縮短交貨期。至於下游的製衣廠料下半年可建成，有助長遠發展。申洲基本因素良好，而且股價近日反覆走高，料在業績前仍會維持強勢，建議逢低跟進，相信股價短期可突破30元關，挑戰35元水平。