小陽春效應下新盤銷情火熱，就算新春將至，發展商部署推盤步伐都未見減慢。地政總署最新資料見到，上個月又有3個新盤入紙申請預售樓花，加埋約1,143伙，創半年新高。當中新地（00016）食住東涌東環熱銷個勢，拿拿臨為項目第二期申請賣樓，呢個盤提供932伙，發展商預計可以喺第三季開盤。

東涌東環（前）推出單位火速沽清，新地乘勢為項目第二期申請預售。（資料圖片）

長實楊桂玲表示，紅磡悅目最快下周發布樓書。

新申請預售樓花單位量一覽

劉Sir尋日喺地政總署資料睇到，上個月共有3個新盤入紙申請預售，涉及1,143伙，當中以東環發展項目第二期規模最大，提供932伙，呢個盤預計出年十一月底落成。新地副董事總經理雷霆同劉Sir講，希望幾個月內可以獲批售樓紙，預計第三季可以發售。

至於上個月其餘兩個入紙申請預售嘅樓盤，分別係長實（00001）元朗屏山洋房項目同世紀城市國際（00355）元朗丹桂村路項目，呢兩個盤分別提供41及170伙。長實日前先透露屏山洋房項目希望今年內登場，預計今年只會先推25伙發售。

七千伙待批 五個月高

地政總署資料又睇到，原來上個月未有任何住宅樓盤獲批預售樓花，喺二○一三年四月之後首次出現「零」批出情況，而截至上月底，共有7,046伙待批預售樓花，數字創咗近五個月新高。

其他新盤方面，長實營業經理楊桂玲話，尋日向地產代理發出紅磡悅目尋日宣傳委託書，最快下個星期發布樓書。

長實悅目冀月內登場

佢又話，新春之後有機會隨即開放示範單位，二月之內可望開盤。悅目預計出年年底入伙，項目距離港鐵何文田站僅約六分鐘步程，到時啲住客可以享受明年中通車嘅觀塘延線方便。

九建（00034）市務及銷售部總經理楊聰永透露，旗下堅尼地城豪宅新盤加多近山，落實夥拍經絡按揭轉介推出高成數或低按息計劃，按揭額高達成交金額的70%，或息口全期低至最優惠利率減3.1厘。加多近山重推後已賣咗8伙，套現逾1.6億元，呎價28,984至34,845元。

據一手銷售資訊網資料，西營盤懿山尋日更新價單，5樓B單位減價約9%至926.3054萬元，呎價24,060元，部分單位新增最多12.5%特別折扣。