全球央行鬥「晒冷」，放水唔使本之下，個個都睇實美國聯儲局前晚議息後有乜講，以為主席耶倫會繼續使出拖字訣，加息保持「耐性」之餘，仲會戴定押後加息的頭盔，提一提外圍不明朗可能影響美國經濟。殊不知從議息聲明，睇唔到任何聯儲局有意將利率正常化延遲的迹象，更無話低油價會壓抑通脹，反而話有助提高消費者購買力云云。

內地零售增長持續放緩，難怪幾隻副食品股近排走勢麻麻。（資料圖片）

太陽日誌

在聯儲局擺出一副與全球央行對着幹的貨幣政策姿態下，金融市場反應就最老實，華爾街三大指數尾市倒水一樣，道指跌近200點收市，乃踏入一五年以來收市新低，美匯指數掉頭回升，不過債商唔多信聯儲局真係有條件大力加息，十年美債息急跌0.1厘，去到1.72厘，是一三年五月以來最低，而三十年債息更加落到去2.29厘，創下歷史新低。

到底係聯儲局得把口？抑或債商睇錯？還是聯儲局會喺七月之後會酌量加息？史提芬就認為，一旦聯儲局確定啟動加息，展開緊縮資金成本周期後，斷唔可能加佢一次半次就發現經濟頂唔順，走番轉頭再減息甚至QE，所以「首加」一定相當小心，實行寧遲莫早。

美國加息拖住先

尤其單單在過去近半年，美國完成每月的購買資產計劃後，市場對加息殺埋身的預期升溫，已經將美元匯價推到半天高，道指去到萬八點經已拒絕再升，一旦聯儲局落實由寬鬆回到正常貨幣政策，美元及華爾街所受的震盪只會加劇。

現時歐、日經濟情況不明朗，中國亦然，希臘這個計時炸彈未拆，聯儲局敢唔敢喺六、七月開始加息？筆者膽粗粗批死佢機會應該細過一半，看官又不妨放長雙眼睇吓，下次美國議息要去到三月十七、十八日，美股投資者會唔會再一次自己嚇自己，最終要耶倫一如去年，在股市急跌壓力下，出嚟放風話未有耐加息，以恢復股市穩定。

恒安毛利率看升

港股在美股連插兩日下，好友終於托唔到一月期指高位結算，尋日恒指低開216點後，最多跌過337點，埋單跌265點，收24,595點，全日過千隻股票向下，跌得全面，二月期指收24,596點。

A股腳軟拖累中資銀行及保險股，主要係愈來愈多基金認為，近期人行連續進行逆回購操作，使到短期內全面降準的機會率降低，中資金融股失去咗炒作故事，使國指跌幅大於恒指，收11,736點，跌227點。睇走勢，恒指及國指今浪大有可能先試試24,313點及11,544點的支持位。

隨着能源及原材料價格向下，大行都紛紛從慳皮的角度去尋寶，尋日高盛將恒安（01044）放入確信買入名單，認為佢係油價下跌的受惠者，有利未來幾年毛利率繼續改善，而衞生巾產品的高銷售增幅，亦都會推動恒安一四至一六年複合年銷售增長率維持在13%左右，目標價睇102.5元，尋日恒安股價逆市升3.5%，收88.8元。

查實以往每當內地原材料價格及通脹回落，幾隻副食品股毛利率同股價都會學恒安一樣水漲船高。不過，今浪就唔輪到佢地，事關大孖沙睇毛利率改善之外，更重視top line（銷售額）可唔可以維持增長，但內地零售增長持續放緩，睇番統一（00220）及旺旺（00151）去年上半年銷售額增長得1.3及5.6%，康師傅（00322）仲差，九個月倒退4%，估值又唔平得恒安好多，難怪近排走勢麻麻。