面對全球央行紛紛加入量寬行列，積極放水，美國聯儲局前晚的議息聲明，對加息態度卻似乎未有改變，拖累隔晚道指再跌近200點，港股昨日低開216點之後，跌勢持續，恒指最低見過24,524點，收市跌265點，報24,595點。國企指數則跌227點，收報11,736點，全日主板成交金額894億元。

巨騰股價調整後，相信已反映筆記本電腦市場放緩的負面因素。（資料圖片）

阿莊一早覺得個市唔多對路，事關之前升市主要係輪流挾重磅股，整體氣氛根本唔配合，所以期指尋日一結算，個市就散。恒指收市雖勉強守得住10日線，但後市下試20日線24,195點的機會仍然不低。

內地股市料續偏軟

內地股市同樣唔精神，滬綜指低開並失守3,300點關，最後收報3,262點，跌43點。繼中証監早前對內地三大券商罰停開兩融新戶之後，周初內地銀行亦調低傘形信託配資槓桿，加上下周中証監將再次針對券商兩融業務展開檢查，相信內地股市短期反覆偏軟居多。

近日炒得熱烘烘的新股，尋日開始有少少燶味，之前升得最狂野的日成控股（03708），尋日急挫17.8%，新龍移動（01362）及BBI生命科技（01035）亦分別跌超過9%及7%，至於啱啱獲悉數行使超額配股權的泰加保險（06161），總算頂得住，收市仲逆市升4.05%，但全日波幅超過十幾個巴仙，咪話唔得人驚。

半新股有散水迹象

事實上，新股都炒咗一段時間，而且唔少升幅驚人，尋日開始有「散水」的感覺，睇格局仲有排跌，所以投資者千祈唔好手多撈底博反彈，唔係隨時返家鄉無期。主要從事筆記本型電腦外殼業務的巨騰（03336），尋日股價逆市做好，升4.8%，以4.14元收市。

事實上，巨騰股價調整已有一段時間，主要是市場憂慮全球個人電腦銷售放緩，筆記本型電腦增長有限會影響巨騰的銷售。不過，經過半年多的調整後，相信現價已充分反映負面因素，現價往績市盈率只有6倍左右，估值有一定吸引力，加上集團有見電腦銷售放緩，已積極開拓智能手機業務，從而減低過分依賴單一業務的風險。

巨騰上月曾在市場回購股份，對股價有支持作用，昨日在成交增加配合下回升，並逼近100日線4.16元，短期升穿此阻力位，可進一步挑戰4.5元水平。