工廈活化政策喺政府牽頭之下，好多企業都踴躍參與。尋日劉Sir去咗參觀金寶集團第一個工廈活化作商廈項目葵涌KC100，佢哋嘅集團主席李秀恒話，物業投資額達6億元，如果全幢租出每年租金收入近1億元。由於睇好呢類物業前景，所以喺葵涌、黃竹坑同埋油塘灣仲有3幢工廈準備活化或者改裝。如果今年遇到合適項目，佢哋唔排除可以趕及喺活化政策叫停前再作投資。

金寶集團李秀恒（左）表示，KC100為集團第一個工廈活化作商廈項目，投資額達6億元。

KC100將於下月完工。

聽李秀恒講，KC100會喺下月完工，每方呎成本高達2,000元，喺集團第一個工廈活化作商廈項目，依家已經有一低層全層畀外國時裝公司承租咗，另外仲有四層樓面合共10萬方呎獲洽租。

黃竹坑偉晉改酒店

佢又話，原本諗住做酒店用途嘅葵涌金山工業中心項目將轉做商廈項目，估計最快兩年後可以動工，至於黃竹坑偉晉中心都將會改建做酒店項目，最快喺今年底動工，提供350間房間。而油塘灣榮山工業大廈綜合發展項目，就要視乎區內其他發展商嘅發展進度，先至決定幾時動工。

據了解，兩年前政務司司長林鄭月娥已參觀過KC100，當時大廈仲係叫運通製衣大廈。睇番時間，政府嗰陣正正研究緊放寬活化工廈政策，當時曾經諗過喺《城規條例》加入「過渡性住宅」用途。

仲量聯行九龍商業部主管鄧錫衡話，KC100樓高12層，樓底高度約2.5至2.8米，總建築面積接近30萬方呎，包括咗9層甲級寫字樓，標準樓層建築面積約24,663方呎，意向呎租約24至28元。

KC100目標金融租戶

物業另有兩層商舖及餐飲樓層，提供逾6萬方呎樓面，意向呎租約30至40元，目標租戶主要係金融同保險後勤部門，而該廈活化前呎租約7元。

李秀恒又話，KC100啲單位唔急於出租，因為得9層寫字樓，預計只要5至6間企業承租就可以租晒出去，所以最重要喺選擇合適嘅租戶。

另外，由於作為甲級商廈，呎租水平比較高，所以好難租畀藝術團體，但就會每年預留150萬元資助藝術團體喺地下大堂設置展覽，打造文化藝術空間，依家已經聯絡緊康文署同埋兩個青少年團體。

KC100小檔案

位置：葵涌葵昌路100號

投資額：約6億元

物業樓層：樓高12層

物業總建築面積：近30萬方呎

寫字樓建築面積：共約22萬方呎，每層約24,663方呎

寫字樓意向呎租：24至28元

零售樓層建築面積：共超過6萬方呎

零售樓層意向呎租：30至40元

預計全年租金收入：近1億元

預計入伙日期：本年第一季