新能源股有番啲鑊氣，上月底暴炒妹話整固後可再上的漢能薄膜（00566）真係動真格了，尋日股價創五十二周新高3.39元，收報3.38元，升13個巴仙，兩個交易日升咗兩成。

另外，見到隻中傳動（00658）都有勢，股價一開市就見5元，埋單升14.9%，收報5.63元，成交大增至1.36億元，呢轉如無意外應該可以直闖6元關！

中傳動主要產銷齒輪傳動設備產品，舊年份中期業績扭虧為盈，賺2.35億元人民幣，營業額升49%至39.5億元人民幣。業績改善，主要係風電行業逐步走出低谷。此外，高速重載齒輪傳動設備及其他產品之銷售亦錄得增長。上周，公司宣布出售虧損的煤炭機械，以及冶煉、建造、發電及開採行業的齒輪業務權益，相信去蕪存菁後，會重點發展具前景的風電、高鐵、地鐵及城軌等傳動設備，有助提升資金效益及進一步改善業績表現。

睇尋日支大陽燭有成交配合，都算係近兩季少見，且見到過去兩個月底部支持上移，睇勢股價應該仲有得去。唔大貪，今浪目標睇6.2元，初步支持可參考尋日的平均成交價5.35元。