香港住屋需求一直有增無減，政府近年密密推地，終於到咗收成嘅時候。有代理老友選咗83個喺舊年落成嘅私人住宅項目統計，合共有15,428個單位，落成量創咗八年新高。由於政府呢兩年都不斷加大推地力度，所以估計明年落成量會升到去2萬個左右，而新界區舊年有24個項目落成，合共有10,477個單位，唔單止按年多咗56%，數字仲係十年新高。

去年全港落成的私人住宅項目涉及的單位大幅增加。（資料圖片）

環宇海灣

本港私人住宅供應量

中原地產黃良昇同劉Sir講，選取83個喺舊年落成嘅私人住宅項目統計，合共提供15,428個單位，比起二○一三年嘅8,254個，大幅多咗7,174個或87%。

新界供應佔近七成

呢個數字仲係○六年錄到16,579個以嚟嘅八年新高，成功扭轉過去七年落成量偏低嘅局面，而○七至一三年平均每年只有9,665個單位。

睇番各區數字，新界區嘅供應仍然係最多，不過增幅反而唔及市區。新界區舊年有24個項目，合共10,477個單位，比一三年嘅6,717個，多咗3,760個或56%，落成量創十年新高，亦都佔咗同期全港落成量嘅68%。

九龍區發力涉33項目

而最多供應首三位係將軍澳、荃灣同元朗，分別有2,432個、2,157個同2,072個，單係呢三區加埋就有6,661個單位，佔咗新界區落成量嘅64%。

市區落成量升幅好明顯，九龍區有33個項目，合共2,836個單位，按年多咗1,831個或1.8倍，其中長沙灣及油麻地分別有875個同661個單位。

至於港島區就有26個項目，合共2,115個單位，按年多咗1,583個或三倍，落成量係九年新高，其中西區同銅鑼灣分別有622個及609個單位。

舊年有唔少超過千伙嘅大型項目落成，好似荃灣環宇海灣有1,717個單位，將軍澳緻藍天共1,648個單位，元朗溱柏共1,620個單位，而大埔嵐山一期就有1,071個單位。

市場供應增加，但資本策略（00497）執行董事方文彬認為，市場仍以用家為主，入市態度冷靜，現時細價樓最受市場歡迎，買家見500萬元以下物業便會入市。