上市仲未滿月嘅BBI生命科學（01035），上周五創出新高，一度高見1.98元，可惜收市升勢無以為繼，只係升得4%，收報1.82元，但都終於上返水面（招股價1.75元），鑊氣同其他半新股比差得遠，有勢挑戰2元關，可以做追落後冷敲對象！

BBI係內地最大的DNA合成產品供應商，市佔率近兩成，另亦提供基因工程服務、生命科學研究耗材、蛋白質及抗體相關產品及服務，主要客戶為高等院校、大學及科研院所，來自中國的收入佔比逾七成。望吓業績，一一至一三年分別錄得純利3,309萬元、3,343萬元及4,029萬元（人仔．下同）。雖然期內毛利率持續下降，不過去年上半年已見改善，由一三年同期的49.8%升至52.8%。

至於未來發展，生命科學將深化產品及服務組合、設立分公司拓展直銷網絡、加強訊息技術能力等，若然成功擴大海外市場，有利公司業務持續增長。