屯門係未來住宅供應嘅主要地區，今個禮拜五又有一幅屯門地皮截標。呢幅屯門第18區業旺路商住地，提供最大樓面約莫14.3萬方呎，由於項目規模較小，亦無限量條款，劉Sir相信市場反應會唔錯。但係地皮有個致命傷，就係位置唔多方便，所以測量師都預期做價唔會太高，市場估值大約3.29億至4.29億元，即係每方呎樓面地價只係約2,300元起。

屯門第18區業旺路商住地，屬上季加插入賣地表的新增土地。

理想城市張聖典指屯門地位置遜色，但勝在無限量條款。（資料圖片）

劉Sir知道，呢幅屯門第18區業旺路商住地，係上季先加插入賣地表嘅新增土地，地盤面積大約2.6萬方呎，可建樓面最多約14.3萬方呎，而今次呢幅地皮就無限建最少單位數目嘅條款。

投資額細料有捧場客

老友理想城市張聖典就認為，幅地嘅位置真係遜色啲，輕鐵又唔能夠直達，但就勝在無限量條款，而且投資額都算少，相信都會有捧場客入標競投。佢預計地皮每方呎樓面地價約莫2,700元，估值大約3.86億元。

劉Sir話畀大家知，其實屯門區地皮嘅樓面呎價都真係幾參差，可以話「你的位置如何，你的地價也必如何」，好似舊年屯門區就批出咗6幅地皮，其中位置距離市中心嘅分層住宅地有4幅，包括井財街、景秀里、良德街、同埋良德街與震寰路交界限量地，佢地嘅成交樓面呎價只係介乎約1,530至2,517元。

樓面呎價最高三千

喺市中心嘅屯門仁政街限量商住地，舊年以超過4.2億元批出，樓面呎價達約5,307元，仲成為咗樓面呎價最高嘅屯門分層住宅地皮。

而投得該地皮嘅資本策略地產（00497）當時仲表明，睇好地皮鄰近西鐵屯門站同埋屯門市中心等多個商場，而地價正正反映出其附有嘅商業價值。

至於將截標嘅業旺路商住地，雖同樣具備咗商業元素，但位置就真係相差「十萬八千里」，所以市場估值都唔算好進取，預計每方呎樓面地價約2,300至3,000元，估值大約3.29億至4.29億元不等。

屯門商住地小檔案

位置：屯門第18區業旺路

佔地：約26,135方呎

總樓面：約143,057方呎*

市場估值：約3.29億至4,29億元

每方呎樓面地價：約2,300至3,000元

截標日期：本周五