前日A股小股災，事實上去年十二月二十四號都曾經發生過一次，當時A50指數期貨下午半日市急跌一成，只不過由於大部分香港人已經放假，加上聖誕期間有利好政策出台，令A股再創新高，因此市場才對A股的急升急回沒有太大感覺。

A股始終是個不成熟市場，但畢竟A股是中國人主場，水位由他們來決定，走勢與外圍市場可以完全不同。

投機短炒宜限注

要投機A股，就必須食得鹹魚抵得渴，既然難以捉摸高低位，唯一方法是限注投機短炒，建議注碼不要超過整個組合的百分之二十，亦千萬不要相信會有大牛市出現。相比其他成熟市場，A股上落波幅大，故不適宜視作長期穩健的投資對象。

事後孔明，周一的跌勢不應該太恐慌，尤其今次擺明是斬孖展，沽家不是防守力弱就是先走為敬，超賣之後，多數會有一個似樣的反彈。之前亦已經再三指出，市場槓桿縮減是有利寬鬆政策的推行，預期之後將會減息或者減準。

不過和去年十二月一役相比，水位應該比當時更加高，再加上投資者受了這次回吐的驚嚇之後，A股只會進入一個反覆整固期，應該至少一至兩個星期，雖然不應該看得太差，中線可以博減息或者減準，但面前反彈力度有限，相信難以再創新高，與上年十二月尾的走勢將會大相逕庭。

反而今個星期，預計外圍走勢應該會繼續轉好，如果揀港股的話，應該側重外圍相關性高的股份，或者索性簡簡單單的去買美股。