港鐵（00066）繼續貫徹佢哋開標高效率，前日才截標嘅將軍澳日出康城第六期項目，喺尋日公布由南豐集團投得，雖然佢哋之前曾經入股發展過第二期，但今次係南豐首次自己投得發展，係繼長實（00001）、新地（00016）同會德豐地產後，第4家投到日出康城項目嘅財團。

將軍澳日出康城第六期項目由南豐集團投得，項目提供單位上限約2400伙。

南豐蔡宏興表示，集團對地皮未來發展潛力好有信心。（資料圖片）

港鐵將軍澳日出康城第六期截標結果

港鐵尋日公布，日出康城第六期項目合約由南豐集團投得。劉Sir知道，呢個項目前日收到7份標書，涉及最少12家發展商，包括日出康城有項目嘅長實、新地同會德豐地產都有入標。

蔡宏興：睇好發展

較特別係有唔少財團組合競投，好似新世界（00017）就首次拍住恒地（00012）同遠展（00035）入標，而萬科置業（香港）就同英皇國際（00163）等亦合作投標。

南豐發展蔡宏興話，今次投到嘅第六期項目位置臨海，配合區內未來嘅多項發展計劃，好似計劃興建嘅大型商場等，集團對地皮未來發展潛力好有信心。

劉Sir話畀大家知，南豐表面上係首次投得日出康城項目，但其實佢哋喺呢邊都有發展經驗，事緣該集團喺○六年曾經入股由長實投得嘅第二期發展，佔項目權益大概15%。

有測量師覺得有新勢力進駐日出康城，對嗰區將來發展係好事。老友高緯環球張翹楚同劉Sir講，南豐喺將軍澳一向都有發展項目，唔會陌生，而多咗財團參與發展日出康城，可以令項目設計上更加多元化，對後市會有刺激作用，估計將來落成後實用呎價約莫1萬至1.1萬元左右。

最少提供千六伙

劉Sir知道，呢個日出康城第六期發展補地價金額約莫33.45億元，每方呎補價約2,269元，比起第五期每方呎高出超過兩成，而今次項目不設前期工程費，分紅比例就最少15%。

除咗項目地契規定要提供最少1,633個單位，港鐵亦特意設定單位數目上限最多約2,400伙，容許發展商打造中小型單位。