一三年十月以招股價2.8元上市嘅耐世特（01316），至今走勢依然唔錯，背靠央企中航工業，實屬穩打穩陣之選，公司去年上半年已簽約業務金額90億美元，相信當中有個別已於下半年開始投產，足以推動業務持續增長，業績期前可以翻兜。

耐世特為全球轉向器及動力傳動產品供應商，已由傳統液壓動力轉向（HPS）系統轉型至電動轉向（EPS）系統，好似去年七月就向東風標緻2008供應SPEPS。睇番成績表，去年上半年收入增長23.1%至14.3億美元，純利增長39.1%至8,090萬美元，來自中國的收入佔比為12.8%，多過前年同期嘅10.6%。由於新興市場仲有好大發展空間，所以去年三月與重慶長風在重慶江津德感工業園區建設合資公司，有助進一步拓展內地西南部。

至於技術走勢，股價自去年十月起沿住10日線下跌，由高位7.57元碌到落低位6.05元，有見佢本月已突破下降軌頂部阻力7蚊，尋日逆市升逾1%，收報7.29元，睇勢話唔定可以再破頂，唔大貪先睇8蚊，支持6個半。