車位做價升極唔停，好似跑馬地禮頓山舊年十一月有車位以400萬元創屋苑新高價賣出之後，最近又再破頂，有個1樓車位以408萬元賣咗，贏舊紀錄一個馬鼻咁多；而車位一向買賣唔多嘅何文田京士柏山，近期都有車位以300萬元賣出，亦創咗屋苑新高。

跑馬地禮頓山車位最近再創新高價。（資料圖片）

近期部分車位高價個案

依家一個豪宅車位做價分分鐘可以買到一個新界細價樓，好似禮頓山最近創新高價賣出嘅1樓A雙號車位，原業主喺○四年以78萬元買入，揸到依家以408萬元賣出，約莫十一年升值約4.2倍，帳面賺330萬元。

京士柏山車位3球

今次做價雖然破唔到西半山天匯424萬元全港最貴車位紀錄，不過都可以穩守第二位寶座。

近排唔少屋苑車位都錄到創新高，一向好少有車位散賣嘅京士柏山，最近都出現一宗純車位成交，一個LG1樓P雙號車位，以300萬元賣出，係屋苑車位首見3字頭，相比起○二年買入價80萬元，升咗2.75倍或220萬元。

另外，唔少買家趁農曆新年前入市，中原龍智烽話，元朗加州花園今個月暫錄約4宗成交，全部都喺過去一星期內錄到，其中月桂徑單號屋，建築/實用面積1,775/1,198方呎，以1,012萬元賣出，建築/實用呎價約5,701/8,447元。

該行許永生表示，長沙灣宇晴軒今個月到依家已經錄到10宗成交，平均實用呎價升到14,155元。

最近宇晴軒6座高層G、H室，實用面積約950方呎，以1,350萬元成交，實用呎價約1.42萬元，原業主揸咗六年幾，帳面賺690萬元。

賽西湖實呎價兩萬

該行余社朝話，傳統九龍豪宅區今個月暫錄約50宗成交，有個九龍塘畢架山花園2座低層F室，建築/實用面積979/809方呎，以1,023萬元賣咗，建築/實用呎價約1.04萬/1.26萬元。

此外，美聯胡宗樂同劉Sir講，北角半山賽西湖大廈11座中層C室，建築/實用面積約1,260/1,090方呎，以約2,238萬元賣出，建築/實用呎價約1.78萬/2.05萬元，單位○七年到依家升咗約97%。