A股確係一把神經刀，以為滬綜指失守3,200點進入短期調整，殊不知守住20日線後，昨一口氣挾升3.5%或114點，收3,336點，事關阿爺有利好保險業政策出台。

恒指期貨走勢

由於A股調整勢態逆轉，昨日早市在24,100點搵到支持的期指，下午在A股帶動下愈升愈有，好友推期指升穿24,343點的去年十一月高位，現貨收市後即市淡倉投降盤將期指最高推到上24,466點，最後收24,408點，成交僅5萬張，未平倉合約逐漸回升，終於去到約9.6萬張。國期日市收12,208點，成交8.37萬張。

手上各三分一注買入的恒期及國期好倉，成本價分別為24,200點及12,000點，雙線發展暫時帳面上小嚐甜頭。技術上，恒指確認升穿24,313點後，中期的22,529點雙底支持成立，以調整浪的1.236，初訂目標在24,732點附近。

不過，筆者唔敢硬性定下食胡目標，始終未成氣候的期指未平倉合約數字，反映賭大錢的大孖沙唔多，令單邊爆升的威力減弱，而且市況側重個別板塊情況持續，像昨日升市有近800隻下跌股份。總之，如果24,313點破位僅是虛火一道，好友緊記微利埋單好過輸番出去。