傳統上，內地銀行年尾衝存款的習慣，都影響到十二月的新增貸款數字，啱啱人行公布上月新增貸款6,973億元（人民幣．下同），比十一月的8,527億及市場預期的8,800億少。但話分兩頭，個市估得樂觀，全因為人行運用短期流動性調節工具（SLO），以及暗示會將一四年全年新增貸款額度，提高到10萬億，最終出嚟係9.78萬億，比一三年多近8,900億。

置富產業預計息率逾5厘，相對領匯更具值博率。（資料圖片）

太陽日誌

睇番十二月，因為股民落力借孖展，人行落力泵水，滬綜指由2,682點起步勁升20%去到3,234點，尋日數據後，近日在3,300點頂到實的滬綜指，又再發力狂升3.5%，收3,336點，依家市場共識係，在阿爺首肯、人行配合、股市同股民又彈藥不缺下，悶足七年，啱啱發威的A股未係調整之時。

港股多得A股大發神威，恒指升穿舊年十一月高位阻力24,313點，收24,350點，升238點，主板成交升至931億港元。國務院通過機關事業養老體制改革，估計長遠利好養老金管理及投資保險生意，兩隻內險股加埋友邦（01299）成為升市火車頭，國壽（02628）及平保（02318）升3.6%及3.9%，友邦都有2.2%進帳。內銀股抖完氣亦都再發力，工（01398）建（00939）中（03988）三行升幅介乎0.9至1.3%。

小型內房被洗倉

不過不能不提，尋日下跌股份792隻，比上升股份多136隻，創新低股份36隻，較創新高股份21隻多七成，整體市況氣氛唔係指數所見咁好，主要係再有小型內房被洗倉，個別曾經當炒嘅中資股及二三線股亦都浸浸落，在炒大唔炒細，資金在不同板塊之間頻繁轉換下，散仔入市博呢類股份反彈，記緊要訂止蝕，知進退。

近期國際商品價格大插水，油價半年多時間內由107美元殺到落44美元水平，金銀銅鐵無一不跌，覆蓋能源、金屬、農產品、牲畜產品的美國CRB指數，亦由313點跌到落執筆時低位218點，跌幅達三成，只有美元資產一枝獨秀。

前晚美國國債孳息落到最低1.78厘（代表債券價格向上）的接近廿個月低位，反映大孖沙認定全球對大宗商品需求會持續疲弱之外，未來通縮的危機要比通脹復甦更大，唔信睇埋其他經濟成熟市場，十年債息低過美國的，歐洲有英、法、德、意、瑞典、瑞士及荷蘭，北美洲有加拿大，亞洲有日本同台灣，全球超低息經已恒常化，超人話事偈，就算美國今年真係會加息，由債息所見，加幅預期亦會相當有限。

兩電前景有變數

近期高息股再度抬頭，撇除股息回報未來有可能跟隨盈利水平回落的內銀及內房，兩電其實係唔錯嘅選擇，昨電能（00006）更創五十二周高，但一八年同政府再傾利潤管制協議，最後會點仍有變數。

再揀落去，REITs應係比較理想之選。不過，資產集中內地的匯賢（87001）及越房（00405），明顯跟唔上本地物業REITs，早於一三年見頂，即使兩者過去年多都曾經收購新資產，擴大投資組合，但就無法令估計內地商用物業租值短期見頂的投資者釋懷，因此數落去，最正路始終係晒士較大的領匯（00823）及置富產業（00778）。

睇番十年美債息在一三年五月落到1.6厘水平，當時領匯及置富預計派息率落到去3.8及4.5厘，同美息差約2.2厘及2.9厘。今日兩隻REITs一五年預計派息3.5厘及5.4厘，同美息差為2厘及3.6厘，領匯入咗藍籌有指數基金捧場，息差比過往收窄可以理解，不過計落都係置富值博率相對較高。