政府為咗增加住宅單位供應，早幾年開始喺唔少批出嘅住宅地皮加入限呎、限量條款，呢批項目陸續踏入動工階段。睇番屋宇署最新數字，舊年十一月私宅動工量約1,461伙，按月大增近1.8倍，係前年十月以來近13個月最多。數字攀升，主要係長實（00001）喺一一年投得嘅本港首個限呎盤元朗安寧路住宅項目獲批動工，涉及1,129伙，單位可用面積大約288及409方呎。

本港去年十一月私宅動工量按月大增近1.8倍，升幅顯著。（資料圖片）

私宅動工量按月統計

元朗安寧路住宅項目

劉sir睇到屋宇署最新資料，舊年十一月私宅動工量按月明顯增加咗近1.8倍去到1,461伙，係一三年十月後單月最多，當中最有份量係本港首個限呎盤嘅元朗安寧路住宅發展。呢個項目將會興建4幢28至29層高商住樓，住宅及商業樓面分別佔大約61萬及6.4萬方呎，單位平均可用面積約288及409方呎。

長實元朗項目規模大

劉Sir知道，長實計劃今年推出呢個元朗限呎項目，係集團年內部署開售比較大規模嘅新盤之一。不過，舊年頭十一個月加埋只係得5,942個單位動工，比起一三年同期少咗超過四成。落成量方面舊年十一月就有849伙，頭十一個月累積13,142伙，係近四年最多。

楠樺居舊址准建洋房

此外，屋宇署喺舊年十一月就批出咗21份建築圖則，住宅及商住發展佔6項，以低密度豪宅為主，比較特別係東半山寶雲道16號楠樺居舊址，准建兩幢3層高洋房，總樓面大約1.49萬方呎。公司註冊處資料顯示，申請人Wealthy Trendy Limited嘅董事係吳世杰。另南區赫蘭道7號准建1幢3層高分層住宅，總樓面約莫1.9萬方呎。而新地（00016）舊年投得嘅屯門良德街限量地，亦獲准發展1幢29高層高商住樓。

而期內亦有7項商業項目獲批圖則，其中太古地產（01972）鰂魚涌太古坊2B期發展，准建1幢42層高商廈，總樓面約莫98.3萬方呎。毗鄰嘅康和大廈其中1層佔地1萬方呎嘅開放式工作空間由11家blueprint創業公司免費使用半年，另1層則以每人每月2,000元供同類公司租用。