港鐵西港島線上個月正式通車，成個區交通出現大改善。唔少新租戶及投資者喺通車之前已經搶先進駐呢區，單係舊年十月至依家，計落已經有至少10間新食肆進駐，而過去一年區內舖價同租金平均都升咗三成，主要街道舖租升幅就最明顯，好似人流最旺嘅卑路乍街有三個舖位，由燒臘茶餐廳以月租30萬元租咗，比舊租金勁升2.7倍。

西區卑路乍街吸引特色食肆進駐，現時猶如小型蘇豪區。

商戶心聲
生意轉旺
鍾先生：在卑路乍街開設粥店的鍾先生稱，通車後，區內平日人流較前多兩成，多為曾居於西環的舊居民，現時生意額上升了約一成。

租金難頂
宋小姐：於卑路乍街開設服裝店的宋小姐稱，近期不少舊居民回來區內逛逛，料食肆最受惠，惟區內舖租加幅勁，不少商戶已經遷走。

西區部分舖位最新租賃成交個案

美聯旺舖侯柏宇同劉Sir講，自從○七年港鐵公布會起西港島延線之後，區內舖位買賣同租務都開始變得活躍。直至近兩至三年，區內有多個住宅新盤落成，區內人口增加，連帶個別街道嘅商戶都出現轉變，好似卑路乍街同埋爹核士街變化最大，由過去以車房為主，變成特色食肆集中地，依家猶如小型蘇豪區。

租售價料再升兩成

睇番市場資料，舊年十月到依家，呢區至少有10間新食肆進駐，另亦有5間續租，好似卑路乍街單號地下A至E號三個相連舖，面積共約3,700方呎，由燒臘茶餐廳以月租約30萬元承租，呎租約81元，比舊租金勁升2.7倍，原租客係窗簾店同地產代理等。代理老友預期，未來一年呢區街舖租同售價可升15至20%。

英華臺舖嗌6700萬

而同一街道一個單號地舖連入則閣樓，面積1,700方呎，以月租6.8萬元租咗比米線食肆，呎租40元，比舊租金升一倍，原租客係地產代理；而同街單號三個相連地舖，面積4,500方呎，原本租客係意大利西餐廳，現由粵菜餐廳以月租22.5萬元承租，呎租50元，比舊租金高42%。

侯柏宇話，事實上，自從○七年起，呢區舖價已經升咗唔少，好似英華臺1至6號兩個舖喺○八年由買家以約1,080萬元購入，其中一個舖舊年以1,100萬元沽出，而另一舖位就以6,700萬元放售中。美聯旺舖倫銘智話，舊年區內舖位租售價平均升咗三成，預期未來一年呢區舖市走勢平穩，租金同售價估計可升15至20%。