喺新居屋及新白居二政策帶動下，公屋及居屋無得輸，成交價持續做好。劉Sir昨日收到風，粉嶺居屋景盛苑一個兩房單位以綠表價253萬元沽出，呎價約5,843元，創咗屋苑居二呎價紀錄新高。另外，私人拍賣場以226萬元賣出藍田公屋德田邨德樂樓低層一個事故單位，只係比市價低約一成半，買家係用家，反映市場缺盤，用家肯畀多少少入市。

藍田公屋德田邨德樂樓一個事故單位昨日以226萬元拍出，較市價低約15%。

粉嶺景盛苑有兩房戶以綠表價253萬元沽出。

居二市場200萬元或以下成交佔整體比例

六福行陳寶華同劉Sir講，粉嶺居屋近排都有高價成交，景盛苑B座高層有個兩房單位，實用面積433方呎，綠表客覺得抽到新居屋機會唔高，加上單位有裝修，減咗2萬元後，即決定用253萬元買咗個單位，實用呎價約5,843元，創咗屋苑居二市場新高呎價。

另外，劉Sir八到，忠誠拍賣昨日成功賣咗藍田德田邨德樂樓4座低層事故單位，個單位實用面積約385方呎，自由市場開價198萬元，獲三組買家共承價9口，最終由一組用家以226萬元買到，搶高咗14%，呎價約5,870元，只係較市價低約15%。

天頌自由價305萬沽

一般嚟講，以前賣嘅事故單位，售價通常都會較市價低差唔多三至四成，就算只係與事故單位同層嘅單位，都只會低市價約莫一至兩成，所以上述事故單位，成交價可以算高。

另外，該行喺拍賣前亦賣咗天水圍天頌苑頌畫閣中層12室，實用面積535方呎，以自由市場價305萬元售出，呎價約5,701元，屬市價，據悉，該物業早前以開價260萬元推出拍賣。

新界免補價平樓少

細價居屋「買少見少」，中原研究部聯席董事黃良昇話，去年新界區價值200萬元或以下的居屋第二市場成交佔整體約9.3%，按年下跌5.5%，反映樓價上升，新界區嘅細價居屋盤源愈來愈少。

黃氏又話，去年價值400萬元以上的居屋第二市場交投，當中以港島區所佔成交比例升幅最勁，該類物業佔整體居屋第二市場約4.6%，按年升咗2.3%。