上周五四環醫藥（00460）升近半成至5.59元，即市一度掂到100日線5.68元，啱啱出現黃金交叉，後市應該仲有睇頭。

四環主攻心腦血管處方藥業務，去年上半年營業額倒退13.9%至20億元（人民幣．下同），純利增長34.4%至8.3億元，毛利率亦由79.5%升至79.8%，原因係高毛利產品銷售佔比增加。近期公司動作多多，繼去年底與兩名投資者向合營淮安淮陰醫院及南京江北醫院，分別注資8.3億元及4.1億元後，今年初斥1,500萬元收購北京銳業製藥9.88%股權，完成後將對其增資5,500萬元，屆時持股量增至39%。德銀報告話佢仍揸住現金23億元，有足夠彈藥去買嘢。

去年內地中西藥品零售額增長放緩，歸根究柢都係因為中央打貪，令到各省藥品招標進度放緩，同時推出限價令及收緊醫療保險費用預算，但今年發改委將分批下放定價權限，包括藥品及醫療服務等價格。近月四環股價調整，已令估值變得吸引，上周喺250日線觸底反彈，有勢再戰一年高位6.68港元，支持5港元。