上周五美國勞工部公布十二月就業數據，失業率進一步回落至5.6%，創○八年六月以來新低，非農職位增長25.2萬個，較市場預期的24萬多。不過，華爾街股市三大指數全線向下，跌幅介乎0.68至0.95%。十二月就業數據其實有點乍暖還寒，非農職位增長唔錯，之前月份也獲向上修訂，不過，美國打工仔容易搵工，唔等於份工好pay，薪酬趨勢顯示，十一月強勁增幅向下修訂之外，十二月更按月跌0.2%，同分析員估計0.2%升幅有頗大出入。

吉汽上月銷售表現不俗，業績最壞時間或已過，股價回升可期。（資料圖片）

太陽日誌

雖然話投資者都樂見美國經濟穩步復甦，最理想係力度唔好太強，免得觸碰到聯儲局提早加息的緊急制，但講到工資趨勢逆轉，就唔同講法，尤其內部消費佔美國經濟比重近三分之二，打工仔荷包唔漲對消費市道無好處。上周五美國國債孳息曾經抽上2.02厘，最後低收1.97厘，結合股市，反映投資者唔怕加息殺到埋身，反而驚美國就業市場復甦未及想像中咁理想也。

長和重組釋放價值

上星期大新聞，一定係長實（00001）及和黃（00013）重組。話說兩間公司，會將地產以外業務先併入長實，之後以新公司長和持有港口、電訊及零售資產；同一時間，所有其他地產、收租項目，房地產信託基金等獨立分拆成新公司長地。

唔少人將遷冊與撤資畫上等號，有冇咁諗只有超人至知。牌面事實係，要長實先吞和黃，或者和黃吞長實，再重組分拆地產業務出嚟，在現行香港公司法之下，技術難度好大，由於長和資產規模太大，就算夠retaining earning為實物分派沖銷，以後都難免影響派息，用開曼群島註冊公司去做，確實是比較簡單且可行的辦法。

總會有陰謀論，認為重組可能係睇淡地產或者赫斯基能源，其實後者近期跟住油價回落，與去年六月高位比跌咗三成，股價返回一二年水平，查實唔貴。但姑勿論點，純以技術層面出發，以往兩間公司地產投資，慣例長實、和黃各一半，形成長實經和黃持有的項目，長期出現較大控股公司折讓。

新能源股未博得住

今次一鋪過由垂直式架構，變番平排拆開兩間公司，最大好處係可以瞬間釋放到以前寄居和黃下面的地產項目的價值，而其他非地產項目，亦都可以用番市價PE計數，唔使再打個折頭。瑞銀同長和計數，長實、和黃加埋注入的6.24%赫斯基，資產淨值8,530億元，以上周五佢哋市值6,700億元，大數計折讓21%。

上周五預託證券彈一成，反應是預期之內，暫時睇唔到街外股東有抗拒重組的理由，在下認為今次係比較好的機會清楚兩間公司未來分工，小股民亦可按自己喜好揀番地產或者非地產生意，唔使再食炒雜燴。

上周五A股尾市隊得誇張，升市火車頭內銀股似乎要抖抖氣，醫療及航空股都見鑊氣，國際油價連50美元都失守，一日唔企穩回升，一日新能源股都無古仔去博，反而史提芬都仲係有興趣睇傳統汽車股，之前因俄羅斯盧布插水出盈警的吉利汽車（00175），近日逐步收復失地，由盈警後低位2.4元，去番上周五2.79元，同3.12元插水前有一成一距離。

睇番十二月份的銷售數字唔錯，總銷量5.5萬輛，按年少一成，但按月計升23%，是一四年來最高，主要係重塑品牌後的新推車款EC7及新帝豪賣得幾好，上月賣出2.58萬輛，GX7、SX7及EC7三款主打的高毛利車款，佔整體銷售比例升到六成，比首三季的五成二有改善。

按趨勢，有利一五年業績見底回升，管理層的一五年銷售目標為45萬輛，比一四年多8%，估計今年每股盈利約31分人民幣，計落市盈率7.2倍，以內地自主品牌市佔率開始回升，而吉汽業績最壞時間又過咗，博股價上番3.1至3.3元之間，應該唔算奢望。