舊年施政報告提出多項措施增加住宅土地供應，唔少地皮都透過增加發展密度、改劃，同埋加快推地程序，成功推出市場。新一年施政報告前夕，被催促推地嘅市區重建局，啱啱今日就有深水埗福榮街重建項目截收發展意向書，劉Sir知道呢個地盤發展規模有限，但就正好切合依家主打中小型單位嘅市道，測量師老友都預期會有唔少發展商有興趣遞交意向書，項目市場最高估值約2.49億元。

市建局深水埗福榮街重建項目，可提供約90個單位。(資料圖片)

理想城市張聖典稱，深水埗項目規模不大，適合興建中小單位。

市建局福榮街項目資料

政府將會喺今個禮拜三公布新一年嘅施政報告，睇怕土地供應都幾大機會繼續成為重點課題之一。其中市建局相信都會繼續配合政府，推出重建項目應市。

至於上述福榮街項目就係安排喺今個財政年度推出嘅最後一個市建局項目，地盤面積大約6,415方呎，住宅樓面約48,127方呎，另有大約6,017方呎商業樓面，預計可以提供大約90個住宅單位。

唔少測量師老友都覺得今次個項目適合市場「胃口」，預期今日截收意向嘅反應會幾好。

高緯環球張翹楚就話，長沙灣同埋深水埗新盤銷售成績唔錯，加上呢個唔屬於需求主導項目，吸引力應該會好過早前批出嘅海壇街迷你項目。

同區新盤好賣兼加價

張翹楚估計福榮街項目每方呎樓面地價大約4,600元。計番估值大概2.49億元，係目前市場估值嘅上限。

事實上，深水埗同長沙灣一帶單幢住宅真係有價有市，好似房協旗下嘅喜韻咁，喺上個月底一口氣推售項目175個單位，短短半日內迅速售罄。

又好似恒地（00012）同區嘅曉尚，之前就更新咗價單，其中4個單位加價約2至5%，計埋削減折扣優惠同埋取消裝修優惠等，變相加價最多約一成。

短期增供應難有新猷

對於就快公布嘅施政報告，張翹楚就覺得，可以增加短期土地供應嘅方法，不外乎改劃政府地或者綠化地帶、提高發展密度等，要再搵其他新方法比較困難，所以好難期望今次政府喺增供應層面上會有咩新方案。

而理想城市張聖典則認為，今日截收意向嘅福榮街重建項目，規模雖然細小，主打中小型單位，但相當迎合現時市場嘅口味。張聖典估計對於上述項目，各類財團都會踴躍遞交意向。