聖誕同新年係傳統零售旺季，今年就連豪宅買家入市嘅意欲都推高埋，信置（00083）大埔逸瓏灣II最新標售嘅10伙已全數沽清，套現逾3.697億元，當中天池大宅以逾8,505萬元賣出，更有本地客以近1.9億元掃入6伙。至於新地（00016）旗下嘅東環，累積收票突破1萬張，超購逾32倍，最快周六加推。

新地東環開放全新一房示範單位，買家參觀踴躍。

信置逸瓏灣I及II至今累套逾百億元。

雷霆表示，東環最快周六加推。

豪宅新盤主要最新成交

劉Sir呢幾日仲沉醉緊係佳節氣氛之中，但就不斷收到發展商老友傳嚟開單喜訊，仲要單單都係豪宅大價嘢，當中最大單係大埔逸瓏灣II，10伙招標出售單位全數沽出，其中大廈第6座17樓A單位逸瓏瑰寶天池大宅，實用面積2,380方呎，成交金額8,505.07萬元，呎價達35,736元。

本地客億八掃6大宅

同時，今次招標賣樓仲錄得本地豪客大手掃貨，有買家連環買入大廈第6座6伙高層單位，實用面積為1,672方呎及1,673方呎，全部都係逸瓏瑰寶大宅，總成交價逾1.878億元，平均呎價18,717元，創埋項目開售以嚟最高金額成交。

維港峰4190萬成交

信置營業部聯席董事田兆源話，呢排海景豪宅備受追捧，集團早前亦都賣出大埔天賦海灣第10座全幢單位，作價3.03億元，買家係本地投資者，用嚟做長線收租用途。而呢次逸瓏灣II買家相信係作為自住之用。逸瓏灣I及逸瓏灣II開售至今售逾870伙，套現逾108億元。

港島豪宅新盤市況噚日同樣熱鬧，英皇國際（00163）西營盤維港峰賣咗25樓A單位，成交價4,190.12萬元。新世界（00017）北角柏傲山都賣出3座26樓D單位，成交價1,736.2萬元，項目累售269伙，套現近70億元。

另新地副董事總經理雷霆話，東環明日截止認購，本周六盡推首張價單300伙開售，噚日起開放全新一房示範單位，相信又會掀起入票熱潮，最快周六加推。新地代理助理總經理胡致遠補充，東環首批300伙嘅定價市值逾17億元。

恒地（00012）長沙灣曉尚噚日都更新咗價單，4個單位加價2至5%，同埋削減部分優惠，變相合共加價最多逾一成，本周六發售8伙。