俄羅斯突然加息六厘半，俄國股匯市亂過亂世佳人，相比之下，美國聯儲局每次舉動，都不致令投資市場出現太大波動，好似今浪由減少買債到預告加息的部署，掌握市期預期的功力，確實是令人敬佩。

平價4G手機大量推出，內地手機市場割價戰趨向白熱化。（資料圖片）

太陽日誌

前晚，聯儲局一如預期，從議息聲明中刪除「一段長時間內維持超低利率」的措辭，改為「有耐性地實施貨幣政策正常化」，主席耶倫為免金融市場胡思亂想，仲講明最少未來兩次議息，都不大可能作出啟動加息的決定。消息一出，前晚美股立即爆升288點，而連跌五日的港股亦終見反彈，升246點，收22,832點。

美國短期唔加息住，配合政府長遠房屋政策無乜料到，未來五年房屋供應緊張難免，香港樓價泡沫化好大機會繼續，新地（00016）、長實（00001）、恒地（00012）、新世界（00017）尋日統統向好。至於因俄羅斯金融危機而要就匯兌損失出盈警的吉利汽車（00175），昨日股價再插3%，收2.51元，沽空2,180萬股，比周三急跌時的6,700萬股稍減，但計沽空比率的話，仲企住19.6%，比前日18.2%高，睇嚟淡友死咬住唔放。

比亞迪被洗唔意外

但數到尋日最誇張嘅肯定非比亞迪股份（01211）莫屬，股價由前日收市的35.2元，最低曾插近一半落到18.7元，收市報25.05元，仍跌28.8%。午後四圍打深，傳聞滿天飛，有云股東場外衍生工具對賭出咗事，有云其中一款混能汽車被政府剔出補貼名單，之不過，收市前高管就一一作出否認，只係股價唔爭氣，彈到26元左右又被沽家壓制。

史提芬講過，油價狂瀉後芬佬必有後繼動作，話就話比亞迪股價自九月高位57.8元跌咗唔少，但計落一五年PE依然30倍開外，貴過其他車仔股三倍。強如Tesla，股價亦由九月初歷史高位291美元，一仆一碌撻落200美元邊，故比亞迪被洗，唔算意外。

廉價4G機充斥市場

小米CEO雷軍上個月豪言要在五至十年間，超越三星及蘋果公司，成為智能手機一哥。由於並非上市公司，講到幾兇殘都無人能夠質疑，直到早排入股美的，要向深交所遞交財務狀況，原來舊年賺3.47億人仔，只及十一月外媒流傳業績的十分之一，或者蘋果公司同期營收的一百五十分之一，心水清的同佢計數，1,870萬出貨量，即一部手機賺得18蚊人仔，真係乜幻想都無晒！

早兩日美國掛牌的奇虎360，斥資近32億港元入股酷派（02369），合作擴大低價智能手機「大神」品牌的市佔率，希望五年左右可以挑戰小米的中國一哥地位。查實小米咁快冒起，皆因一個平字，在「紅米」首發時，低於一千蚊人仔的智能手機並唔普遍，但今年售價四、五百人仔的4G手機，在內地市場的出貨量將係數以千萬計，何況手機平台Android屬於Google，唔屬於小米，只要手機夠平，用家買邊個牌子，其實分別唔大。由酷派公布消息後被掟到散晒，大致可以預見，內地手機市場的競爭，可能會比早年白家電市場的割喉減價戰更為激烈。