今年新海能源（00342）股價唔見咗一大截，由二月高位8.55元碌到落本月低位2.22元，跌幅高達74%，十月富達將佢嘅貨沽到低過5%，相反除十二月摩通以每股均價2.604元增持436萬股外，主席亦都趁低喺下半年頻頻增持，睇怕負面因素已經反映，而且尋日逆市突圍，勁升11.7%，可以博反彈機會，阻力睇50日線3.24元，支持喺2.45元。

新海能源過去主打液化石油氣（LPG）進口同批發，今年轉攻液化天然氣（LNG），四月與多家大型巴士公司、跨境物流集團等達成協議，共同在廣東省建設20座LNG汽車加氣站，旨在縮短回本期，其中與中石化（00386）的第一座加氣站已經投產，未來盈利貢獻值得憧憬。

上半年收入增長48.1%至101.5億元，純利微增5%至3.9億元，盈利增長追唔上收入，原因係LPG需求疲弱，同埋人仔貶值下的結構性配對安排帶來匯兌虧損6,763萬元。值得一提係，期內公司油品業務收入激增1.8倍至27.2億元，電子業務亦都復甦，而截至六月底止，LPG業務佔收入比已由84.98%降至61.31%。