昨日滬綜指單日高低波幅257點，以收市指數2,856點，相當於近9%波幅，認真夠瘋狂，最慘係近排帶住指數向上的中資金融股震倉，令今浪不太願意跟升的恒指，跌就一齊跌，昨恒指以穿頭破腳收市，預示短期見頂格局，淡友控制大局。

恆指期貨走勢

恒指連破10日、20日及50日線支持，埋單報23,485點，跌561點，港股主板成交升至1,441億元，上升下跌股份比例1比4.7，是過去一個月以來最極端市況。

港股愈來愈A股化，已唔使多講。回顧過去三星期，有參與買賣的，若手上並非中資金融類股份，贏到錢的恐怕是極為有限，內地流行用「滿倉踏空」去形容揸到一手貨，升市仲要輸錢的實況。

技術走勢上，恒指接近一個半月，在23,252至24,313點窄幅上落，筆者原先以大落後為考量，認為即使A股急跌，港股跌幅未必太大，故昨日指數的跌幅，多少令筆者有點意外。如今只有繼續維持一日唔破位，一日唔追勢的保守投機建議，如果日內確認指數跌穿頸線23,252點收市，證實24,133點、24,313點及24,228點的頭肩頂發揮威力，會以三分之一注碼建十二月淡倉追沽。