尋日叫大家睇定啲先嘅半新股飛魚科技（01022），即市低見2蚊邊，表現確係曳，而另一隻想攪手機遊戲嘅中訊軟件（00299），上周五中途停牌，尋日復牌後升逾15%，即市創出一年高位1.4元，收報1.27元，升近半成，之不過過去盈利同股價都幾波動，暫時都係只適宜列入觀察名單！

中訊軟件主要在日本及內地提供軟體外包開發服務，來自日本的收入佔比為95.5%，日圓咁弱係佢一大隱憂。但由於日本對IT人才需求大，日企為咗提高競爭力就要降低成本，帶動向海外軟體外包的需求增加。

公司上半年營業額增長39%至3.1億元，錄得純利969萬元，去年同期則蝕5,741萬元，毛利率亦升1.6個百分點至13.2%，原因係日本市場對服務需求上升，同埋期內調整服務價格。另一方面，中訊軟件曾於月初配股集資1.4億元，每股配股價7毫子，轉個頭佢即刻有搞作，現正考慮收購一家手機遊戲商，計劃仍有待確認。