受到外圍經濟影響，本港今年經濟增長都唔太樂觀。近年外資企業嚟香港嘅員工有減少迹象，搞到月租介乎約7至10多萬元嘅南區中價豪宅，今年租務表現追唔到大市，好似第一季罕錄建築呎租低過30元嘅赤柱富豪海灣，最近幾個月租金都未彈番，依家叫價低過30元都有，而南區華景園最近有3座單位以約5萬元租出，同類單位今年首季月租曾見5.8萬元，有代理老友預計明年呢類中價豪宅租金仍有微調壓力。

赤柱富豪海灣近月租金未有反彈。 （資料圖片）

今年中細價物業租售價表現相當唔錯，唯獨部分區域中價豪宅租盤租金表現就差啲。美聯方富義話，富豪海灣九月同十一月都有B型屋租咗，成交月租分別約11.5萬同11萬元，呎租都低過30元。

華景園呎租跌一成

依家有間B型雙號屋，建築面積逾4,100方呎，實用面積約2,785方呎，意向月租約12萬元，計落建築呎租都唔使30元，不過暫時只係B型屋先咁筍，其餘型號屋月租都仲幾硬淨。

至於華景園近期有個3座中層B室以月租約5萬元租咗，以實用面積約1,239方呎計，實用呎租約40元，而今年首季有個同座中層B室就以約5.8萬元租出，實用呎租約46.8元，兩者相差有一成。

佢話整體嚟講，今年部分區域豪宅租金表現都追唔到大市，相信部分係由於受外圍經濟因素影響，估計明年整體經濟可能同今年差唔多。

佢相信南區呢類中價豪宅租盤租金仍然有微調壓力，但係一啲超級豪宅同大業主租盤，由於罕有或者會有連裝修、送會籍呢類增值因素，所以租金應該仲有微升。

指數表現反覆向下

睇番地產代理嘅研究數字，呢兩年表現都係追唔到大市。利嘉閣嘅資料睇到，35個豪宅租金指數係一二年十月出現130.03點之後，過去兩年走勢都係反覆向下。

今年初指數跌到129.1點，到今年七月跌到去118.58點，雖然九月升番去120.61點，但比年初跌咗6.6%。