拍埋同期招股的中廣核電（01816）隔離，飛魚科技（01022）吸引力難免被比下去。睇番上周五首日掛牌表現，早市最多抽升逾12%，惟其後升幅愈收愈窄，以接近招股價（2.2）2.21元收市，即係話全日得個吉，In定Out都係睇多一個禮拜表現先諗！阻力位2.48元，支持位兩蚊。

飛魚透過第三方如百度、騰訊（00700）擁有及營運超過300個分銷及出版平台，預期日後開發及推出的手機遊戲將多過網絡遊戲。望吓業績，一一至一三年分別錄得純利2,468萬元、1.2億元及5,257萬元人民幣，毛利率亦由一一年的99.1%跌至95.4%，原因係去年網絡遊戲收益大跌超過四成，其中「神仙道」虛擬物件及升級功能收益減少超過五成，亦反映咗點解佢要力谷手機遊戲，但同時又因為市場推廣活動令到銷售開支大增逾倍，好似「囧西遊」使用蘋果公司App Store應用程式商店行銷費高近600萬元。

至於推新遊戲進度，今年四隻、明年九隻，能否改善業績仍待觀察。