今個禮拜有兩個市建局項目同埋一幅政府土地將先後截標，其中打頭陣係今日截標嘅深水埗海壇街/桂林街及北河街大型項目，以及較迷你嘅海壇街項目，兩項目分別邀請咗23同25家財團入標。唔少老友都覺得今次反應會唔錯，特別係後者隨時可以收到10份以上標書。至於今個禮拜五就輪到鯉魚門徑限量地截標，估值最高約13.5億元。

深水埗海壇街/桂林街重建項目，日後賣樓收益料逾七十八億元。

鯉魚門徑限量地周五截標

高緯環球張翹楚稱， 海壇街項目附有商場發展，對財團具吸引力。（資料圖片）

本周將截標的住宅發展項目資料

深水埗海壇街/桂林街及北河街，以及海壇街229A至G號兩個項目，都會喺今日截標。

劉Sir知道，兩項目截收意向反應熱烈，加埋一共收到52份意向書咁多，而市建局最後分別邀請咗23及25家財團入標。

萬科世房獲邀入標

獲得「入場券」嘅財團除咗長實（00001）及新地（00016）等主要發展商外，仲有萬科置業（香港）及世茂房地產（00813）等呢期活躍投地嘅內房發展商。而標書規定，兩項目日後賣樓收益若分別達到78億及3.5億元，中標財團須按比例向市建局分紅。

高緯環球張翹楚話，今次截標嘅市建局項目位置上鄰近大角咀，由於區內商場配套比較少，而這兩個項目附有商場設施，故對發展商嚟講都有吸引力。

至於規模較細嘅需求主導項目，投資額唔係好大，預計競投氣氛亦會好熱鬧，標書數目隨時有10份以上都唔出奇。

鯉魚門徑限量估13億

至於鯉魚門徑限量地就會緊接喺禮拜五截標，其實呢幅地皮原先定喺上個月二十一日截標，但因應項目要重置停車場，所以政府決定延遲三個禮拜先截標，畀發展商多啲時間考慮，而市場對該區嘅發展前景都幾樂觀。

理想城市張聖典就話，油塘區環境近年優化改善咗唔少，而油塘工業區綜合發展區亦開始重組，佢覺得呢個地盤發展住宅無乜問題，而項目規定提供嘅250個車位，雖然要納入總樓面內，但停車場喺該區有其需要同價值，佢預計地皮估值約13億元。

至於市場估值就介乎約12.56億至13.5億元之間。