過去兩日的V形走勢,唔知幾多即市炒家中招,至少筆者係其一,被周一無特別消息下的急跌嚇怕,止蝕離場,結果昨日大市的報復式反彈,完全未能受惠。

恆指期貨走勢

昨日恒指早市很快測試了即市低位23,293點,好友見頭肩頂頸線23,252點守得住,全日藉中資金融及保險股帶動,逐少收復前日跌幅,最終升286點,收23,654點,主板成交1,044億元。昨日美中不足的,是恒指未能以高於周一高位23,731點收市,否則將呈短期見底訊號。

從周一未平倉合約數字不跌反升,似乎短期震倉的可能性,是高於基金對後市全面絕望齊齊散水,可惜見昨日早市恒指實在太貼近重要頸線,怕破位引發好友冚倉進一步急挫,故未敢貿然追買。

周一的調整是否已完成,暫不宜太早下結論。大市仍有可能在24,133點、24,313點及24,228點,這三個十一月造出高位的頭肩頂後抽之中,當現貨在23,252至24,313點之間,向上向下可能性同時存在。

睇番過去兩日狂跌急升,期權引伸波幅回升,同時沽出認購認沽博後市波幅收窄的值博率也都減低,若非對後向十分有睇法,暫時一動不如一靜。