中國管業（00380）位列仙班，唔係突然爆升都好難留意到佢。隻股繼於九月份炒起後，今個月又開多次車，尋日仲要狂飆22.5%，收報0.076元，大幅拋離保力加通道頂部0.066元，即市創出0.081元的一年新高，現價14日RSI處71，成交亦都配合，唔畏高可小注博見9仙，支持就喺10日線6仙附近。

中國管業從事建築材料（主要是喉管及管件）貿易，業績表現同政府投放多少於基礎建設及公共房屋項目息息相關，目前本港同內地收入佔比為9：1。

望吓業績，公司上半年收入增長18.9%至2.6億元，純利激增九成至808萬元，每股盈利0.061仙，原因係期內私營及公共機構建設發展蓬勃。

另外，截至六月底止，中國管業揸住現金9,680萬元，負債比率由去年底的29%降至27%，財務狀況合格，加上港交所（00388）資料顯示，公司前兩大股東持股量合共約69%，當殼炒亦得！