尋日細細粒嘅康大食品（00834）出現異動，喺成交激增下，即市曾經挾到去1.17元，創咗一年新高，埋單仍升12.6%，收報8毫子，現價14日RSI處65，雖然牛叉擴闊兼短線黃金交叉利好，但考慮到呢隻股平時成交偏靜，高追要留意流通量風險！

康大從事生產、加工、銷售及分銷冷藏及冷凍兔肉及雞肉產品、加工食品（如即食湯類）及其他產品（如寵物食品），首三季錄得純利831萬元（人民幣．下同），去年同期則蝕135萬元，毛利率亦由6.5%升至8.6%，原因係兔肉及雞肉相關產品售價上漲。另外，單睇第三季，海外市場對加工食品的需求增加，令到出口銷售大增七成至1.7億元。

不過，要補充嘅係，公司過去盈利波動，一三年增長29%至638萬元、一二年倒退59%至492萬元、一一年增長2.6倍至1,224萬元、一○年倒退89%至338萬元，其中一三年上半年就因內地爆發禽流感而勁蝕過千萬元，好彩當年第三季能夠收復失地。換句話說，隻股比較啱短癮炒家胃口多啲，參考阻力位1港元，支持就喺0.7港元。