樓價係咁升，除咗住宅單位，賣百零萬嘅市區車位都一樣有人搶。旺角居屋富榮花園車位獲買家以高達128萬元購入，料成為全港最貴嘅居屋車位。另紅磡黃埔花園有相連單位賣到成1,686萬元，估計係該屋苑成交價新紀錄。

紅磡黃埔花園有高層相連單位，以屋苑新高價易手。（資料圖片）

旺角居屋富榮花園車位獲買家以128萬元購入，料創全港居屋車位新高。

富榮花園車位成交紀錄

劉Sir睇到土地註冊處資料，富榮花園地下有個車位，賣128萬元，新買家英文名字屬漢語拼音。據了解，今次個價創全港居屋車位新高，但個價咁細，唔買車位都唔知買乜。

長安邨實呎破八千

家天下黎振傑話，該屋苑車位依家有約二十個買賣放盤，叫價最高去到180萬元，但最平要轉幾十個圈上頂樓嘅車位，約70餘萬元都有貨，今次個車位之前收緊3,600元租，依家可以租到3,800元。除咗車位，富榮花園過去六、日都錄到至少3宗綠表買賣。

上一個紀錄亦係由富榮花園創出，今年二月該屋苑車位以119萬元成交，為當時的居屋車位新高。事實上，市區車位極度短缺，依家一般私人住宅車位做價都要二、三百萬一個，百零萬買到車位真係一啲都唔貴，相信個價有得再上。

另外，公屋亦有高價，青衣公屋長安邨安湄樓中層18室，賣358萬元，係屋苑新高，實用呎價達8,081元。

私樓樓價「無上限」咁急升，代理爆料，外籍買家以1,686萬元買咗黃埔花園11期6座高層相連單位，創屋苑新高，實用面積約1,278方呎計，實用呎價約1.32萬元。

市傳柴灣杏花邨單位亦賣到1,420萬元，應該都係屋苑紀錄。消息話，青衣翠怡花園8座高層F室賣428萬元，實用呎價高至1.16萬元。

珀麗月內連開16單

馬灣珀麗灣今個月暫錄16宗成交，當中6座中層D室賣786.25萬元，實用呎價9,461元，創同類新高。美聯亦都話，荃灣愉景新城10座高層B室，反價5萬賣500萬元，而該屋苑今個月都有7宗買賣。