滬港通的反高潮持續，周四恒指再跌23點，收報23,349點，主板成交得611億元。有時，一些投資盲點真係避無可避，有留意本欄都知，在下強調四月博鰲論壇上阿爺提出滬港通計劃後，恒指升幅遠不如滬綜指，已推算今次兩市互聯互通，北上投資意欲較南下大。結果去到第四日，南下金額連2億元人仔都唔夠，真係得啖笑。

分析員錯估滬港通反應，對港交所盈利預測修訂將陸續有來。（資料圖片）

綜合大行預測港交所業績（港元）

太陽日誌

唔少內地有銀士，一早已經有投資港股門路。之不過，在下都只係估中一半，事關原來滬股通都叻唔得去邊，第一日130億元人仔額度用盡，之後三日愈玩愈縮，額度使用率分別得37.3%、20.1%及17.6%。

基金乏入市意欲

事實過去幾日，除了希望染指中國股票的跨市場基金，有些少興趣經滬港通「濕平」外，主要額度使用者，據知都係一些本身唔夠QFII配額的指數基金，以前要同投行借quota畀3至4厘年息，依家自己股票自己買，不過四日過去，這類套戥活動做得七七八八，滬股通氣氛亦急速降溫。

不得不承認，以指數表現預測滬港通反應，仲有一個盲點，就係兩市之間雖的確開拓了新的交易渠道，可是刺激基金入市買中資股的誘因卻仍未存在。

好似A股，今日市盈率從高位跌咗八成七，盈利增長被估值壓縮所抵銷，君可見，盈利能力最強、佔指數高權重的金融股，得4至5倍PE都是無人問津。宏觀睇，中國經濟結構轉型、GDP增長放緩、政策對企業盈利的不明朗影響下，中資股實在欠缺炒作故事配合，基金在他們身上加上的風險溢價，也愈來愈高。

內地有減息條件

昨日早市港股谷過一浸，主要有基金見星期三國務院常務會議，提出十點協助降低企業借貸成本的建議，惹來人行轉向寬鬆貨幣政策的憧憬。講到底，中國通脹去到五年新低，減息或者減存備率的條件經已存在，不過阿爺堅持小幅定點的調整，幾時至肯減大手減息或者減存備率，確認貨幣政策轉向，到時才是A股鑊氣再現、滬港通有救之時。

講到滬港通反高潮，不能不提港交所（00388），由周一高位189元，隊到落尋日165.8元收市，高位計唔見咗23.2元。

滬港通曝光前，港交所股價在130元樓下，七月在150元左右橫行，如果港股成交落番去六字頭，實在無乜理由唔落番150元附近。幾個月以來，分析員對滬港通形勢的錯估，可以預見短期盈利預測的修訂將會陸續有來。

若再比對外圍幾個上市交易所的預測市盈率，澳洲交易所17.3倍，新加坡交易所22.9倍，處於大牛市的美國CBOE及CME分別26.2倍及25.3倍。睇番港交所，大行之前估藉滬港通之助，一五年可賺66.7億元，比一四年增31%，但PE都要講緊28.1倍，可以想像滬港通唔掂，就算股價已連隊四日，睇落仲係唔值。如果有反彈，減磅為宜。