過往暑假租務旺季過咗之後，租務交投同租金喺需求無咁強勁之下，慣常都會落番少少，但係今年樓市租價齊升，租金升勢嚟到年尾都仲未停。地產代理嘅數據睇到，十月份全港100個大型私人屋苑平均建築呎租約25.1元，連續五個月破歷史高位，比九月份再升1.2%，而租金已經連升六個月，累積升咗11.1%，今年暫時升咗9.1%。

今年樓市租價齊升，租金升勢持續。（資料圖片）

十大屋苑建築呎租統計

中原地產研究部黃良昇同劉Sir講，根據佢哋公司新簽租約統計，十月份100個大型私人屋苑的平均建築呎租升到去25.1元，再創歷史新高。但係十月份升幅，就由九月份嘅2.1%，放緩到1.2%，升幅亦係六個月最小，相信係暑假租賃旺季過咗，租金升勢減慢。

麗港城月升2.6%標青

若然同舊年十二月平均建築呎租約23元相比，今年租金暫時已經升咗9.1%，由於租金勢頭仍然唔錯，黃良昇預計，今年底平均呎租有機會升到去約26元，到時全年租金升幅會有約13%。

十大藍籌屋苑方面，上個月有六個屋苑嘅租金仍然錄得升幅，表現最好係藍田麗港城，平均建築呎租按月升2.6%，去到23.9元。而柴灣杏花邨同天水圍嘉湖山莊，同樣升咗2.1%，依家平均建築呎租約28.9元同14.9元。表現最差係沙田第一城，呎租跌咗1.1%。

另外，長沙灣大埔道曉尚業主陸續收樓，市傳已經連環錄到租賃成交。

市場消息話，該物業低層D室，單位建築/實用面積約597/425方呎，以月租約1.6萬元租出，建築/實用呎租約26.8/37.6元，以今年買入價計，租金回報率約3.4厘。

另一個較低層同室單位，亦以月租約1.7萬元租出，實用呎租約40元，租金回報率約3.6厘。

屯門市廣場回報四厘

由於租金表現唔錯，所以有唔少今年買入嘅屯門區住宅單位，租金回報率都有4厘以上。

祥益地產張淑燕話，屯門市廣場8座低層G室，實用面積約363方呎，以月租8,800元租出，實用呎租約24.2元，以今年五月買入價約252.8萬元計，上址租金回報率約有近4.2厘。