尋日有隻股仔百靈達國際（02326）殺入升幅榜，股價啱啱出現黃金交叉，而且重上250日線0.34元，但係仲未完全脫離過去一年的下降軌，加上往往出現突破後都好快回落，即市高位欠承接力，跟炒建議只宜細細注！

百靈達從事銷售電器及電子消費產品，以及銷售金屬礦物及相關工業材料，雖然去年虧損368萬元，不過預期今年上半年將會扭虧為盈，原因係金屬礦物及相關工業原料業務錄得盈利，同埋八月賣咗蝕錢嘅內地製造廠。

公司已經剝離製造及銷售家電、電子產品及相關注塑元件業務，並於九月以900萬元收購深圳物流公司六成股權，該公司主要在本港同深圳鹽田提供倉庫運輸及貨櫃處理等服務，除可同現有業務產生協同效應外，亦將業務範圍擴大至物流，從而分散風險。

百靈達將於本周四公布中績，睇番幅圖，近日股價由一年低位0.285元反彈，昨以大成交急升9.5%至0.345元，現已成功收復各條平均線，守住50日線0.32元可小注跟炒，阻力睇4毫子。