樓價上升,推動今年租金都有升無跌,亦都扭轉過往新盤入伙要鬥平出租嘅局面。好似入咗伙個幾月嘅西半山NO.1 加冕臺,啱啱有個高層單位以月租約2.6萬元租出,實用呎租約84.7元,創項目新高。有個別業主對租務後市都幾睇好,市場有個一房單位,業主依家意向月租要3.3萬元,實用呎租高達107元。

西半山近期租務成交暢旺,租金拾級而上。(資料圖片)

近期部分高價承租個案

美聯馮國基同劉Sir講,西半山呢排租務成交暢旺,租金仲拾級上升,好似入伙無幾耐嘅NO.1 加冕臺,最近有個高層B室一房單位,以月租約2.6萬元租出,以實用面積約307方呎計,實用呎租約84.7元,創屋苑新高,相比業主一二年買入價,租金回報率都有近3.1厘。

曦巒零議價獲承租

阿馮話,NO.1 加冕臺入伙到依家已經錄到約7宗成交,現時約有30個租盤。

項目其中一個高層B室,單位實用面積約307方呎,意向月租要3.3萬元,實用呎租約107.5元。至於買賣盤方面,暫時約有十多個。

水藍天減價150萬沽

近期有唔少新入伙盤,呎租表現都唔錯。好似八月開始陸續入伙嘅銅鑼灣曦巒,早前就有一個低層E室一房戶,實用面積389方呎,喺零議價之下,由一個內地人以月租2.7萬元承租,實用呎租約69.4元,亦創項目新高。

至於二手豪宅買賣,今個月成交集中3,000萬元以下個案為主。

美聯李錦榮表示,東涌水藍天雙號屋,實用面積約1,717方呎,有個外區用家成功議價150萬元後,終於以約2,650萬元買入,實用呎價約15,434元。

中原陳凱超表示,西灣河嘉亨灣本月錄到6宗成交,其中由內地業主持有嘅3座中層C室,實用面積947方呎,以1,973萬元連租約賣出,實用呎價20,834元,創同類單位新高。

另外,該行陳昌如同劉Sir講,西半山嘉華大廈啱啱破咗今年嘅悶局,有個中層B室,單位實用面積1,157方呎,以1,200萬元賣出咗,實用呎價10,372元,比銀行估價低咗約14%。據了解,上述成交單位喺三十八年間升值約五十五倍。