Fundman睇市：騰訊有買貴冇買錯

尋日升市主要由內銀、內險、濠賭等重磅股份撐住，成個市，下跌股份738隻，多過704隻上升股份，唔少二三線股有回回哋迹象。尋日提過對滬港通初期的取態，股民連香港千幾隻股票都唔識得晒，仲邊有閒情去熟讀埋滬股通五百幾隻股票？所以大大聲細細注無妨，賭大錢暫時唔會諗佢。

金管局下星期開始撤銷每日2萬元人仔兌換上限後，近日唔少銀行密鑼緊鼓，打人民幣高息理財產品主意，相關產品閒閒哋去到6至7厘，相對紅簿仔近乎零息，對於普羅大眾都咪話冇吸引力，但買之前切記要問清楚發行商及相關資產抵押品風險。

另一方面，人仔兌換大門一開，會唔會出現香港存款外流，拉高拆息，影響本地銀行息差，甚至炒家借貸成本向上影響投資市場的情況？希望純粹係筆者杞人憂天，但下星期初開始，就真係要睇實個拆息做人。

新奧有回穩迹象

染藍及半年業績好過預期些少的領匯（00823）再升2.7%，收報48.2元；至於向主席收購北美氣站業務而被基金懲戒的新奧（02688），主席兩度入市增持後，股價有回穩迹象，升1.2%，收報48元。睇交易前新奧股價54.3元，假如當交易的2億美元跌落鹹水海，大約等於每股1.44港元，在氣氛有緩和迹象下，彈番上51至52元並非無可能。

騰訊（00700）季績，第三季度純利56.57億元人民幣，較第二季輕微倒退3%，經調整純利（Non GAAP Profit）及收入分別為64.3億元及198億元人民幣，都稍稍低過預期，微信及「QQ手機版」智能遊戲，一如市場預期放緩，手機遊戲第三季收入，按季放緩一成三。

基金掃貨唔嫌貴

騰訊股價前晚在美國ADR跌3.1%，尋日香港開125元，最終即市抽升4.5元，番到129.5元，倒升0.2%收市。好多人或者會問，騰訊尋日成交金額67.7億元、5,295萬股易手，係近半年最多，睇見業績麻麻依然掃到甩轆的基金到底諗緊乜？查實，以一五年預期市盈率貼近30倍的股份，本來業績可以出錯的容忍度好低，不過，偏偏市場無其他選擇。手遊、即時通訊，買騰訊；電貿，買阿里。在可見的日子，見唔到內地有其他公司有可能挑戰佢哋嘅位置，形成基金30倍、40倍甚至50倍都逼住落注。

不過，講番一句公道說話，騰訊手遊今季表現差，同旗下遊戲結構轉型，由側重輕鬆休閒遊戲，轉向更多相對hard core嘅遊戲有關。睇番就算調低騰訊全年盈利預測的野村，都估第四季手遊業收入會有所回升。

筆者見識過二千年科網股可以有幾咁瘋狂，對比之下，唔夠30倍PE的騰訊，其實都未至於高不可攀。最後都係嗰句，當阿里在美國炒到過50倍PE之下，一係唔買，否則惟有都係揀番隻騰訊。