恒指尋日收市終於成功企穩24,000點樓上，報24,019點，全日升81點，國企指數則升71點，以10,800點收市，全日主板成交金額839億元，交投依然暢旺。內地股市昨日調整，滬綜指收市跌8.8點，報2,485點。

受惠企業軟件及訊息科技解決方案需求增長，擎天業績表現突出。（資料圖片）

下周一滬港通正式啟動，在觀望氣氛濃厚下，相信大戶亦不敢輕舉妄動，估計恒指今日會繼續在24,000點關口徘徊。阿莊覺得呢個禮拜個市唔上唔落，估計在滬港通正式啟動後，市場會有較明確方向，但以目前格局來看，阿莊覺得向下調整的機會較大，所以現階段宜控制持貨量，不宜太過進取。

港交所穩步上揚

港交所（00388）及券商股早前升勢雖不及AH差價股，但今個星期就慢火煎魚式穩步上揚，港交所昨日創出187.2元的一年新高，收187.1元，升幅1.4%。至於周一品題的中國銀河（06881），尋日亦創7.37元上市新高，可惜阿莊定得個買入價太低，一直都無上車，所以呢幾日都係得個睇字。

最近有唔少公司公布業績，尋日點題的敏華控股（01999）昨日再創14.84元一年高位，以14.28元收市，升幅有11%，好過炒股仔，但係阿莊覺得炒業績股，有時都幾難捉摸，未必話業績好股價就一定好，反而在好消息出貨下，隨時掉頭，好似之前隻金風科技（02208），公布第三季度同首三季業績後，股價一度創15.26元新高，點知即日已單日轉向，尋日只係收13.18元，較高位調整超過一成，所以有時炒業績都好睇彩數。

中期盈利升五成

擎天軟件（01297）自周三突破橫行阻力頂部3元關口後，昨日再升7.3%，以3.38元收市。擎天截至六月底止錄得中期溢利4,614萬元人民幣，較去年上升52.7%，期內出口退稅軟件及相關服務增長強勁，電子政務及碳管理解決方案的收入佔比持續上升，由於出口退稅及相關服務增長勢頭持續，估計下半年盈利表現仍然強勁。

雖然擎天基本因素良好，但近兩日9RSI已升至90超買區，相信回吐壓力不輕，建議待股價回落至3元水平才作中線吸納。